Në 40-vjetorin e ndarjes nga jeta të intelektualit Branko Merxhani, Biblioteka Kombëtare e Shqipërisë në bashkëpunim me Drejtorinë e Përgjithshme çelën ekspozitën “Kundërbota e Branko Merxhanit”.
Në ekspozitë shfaqet rrugëtimi i veprimtarisë së Merxhanit me materiale nga Biblioteka Kombëtare dhe nga Arkivi Qendror Shtetëror. Disa nga materialet e ekspozuara janë studimi filozofiko-politik i Branko Merxhanit me titull “Biseda të një epoke-Një Bullgari e tërë”, një shkrim i tij që flet për veprën e Et’hem Haxhiademit “Diomedi”, njoftim i Komandës së Xhandarmërisë në lidhje me personat që dyshoheshin si komunistë si dhe disa dorëshkrime të tjera.
Ekspozita do të qëndrojë e hapur nga dita e sotme deri më datë 3 nëntor 2021 në mjediset e Bibliotekës Kombëtare.
