Princesha Mako e Japonisë, ka hequr dorë nga titulli mbretëror për t’u martuar me të dashurin e saj, i cili është një njeri i zakonshëm. Mako, 30 vjeç, vajza më e madhe e princit Fumihito dhe mbesa e perandorit në fuqi Naruhito, u martua me të dashurin, të cilin e njohu në universitet, Kei Komuro.
Ligjet strikte të trashëgimisë në Japoni, i ndalojnë gratë të ngjiten në Fronin e Krizantemës dhe i detyrojnë të heqin dorë nga titujt e tyre, nëse martohen me njerëz të zakonshëm. Ceremonia, e cila u prit me protesta, u mbajt me dyer të mbyllura pa asnjë madhështi nga traditat mbretërore japoneze.
Duke lexuar një deklaratë të përgatitur, Mako mbrojti vendimin e saj për t’u martuar, duke e përshkruar Kein si “të pazëvendësueshëm” dhe duke thënë “martesa jonë është një hap i domosdoshëm që ne të jemi në gjendje të mbrojmë zemrat tona”.
