Kompania “Salillari”, një prej përfitueseve më të mëdha të parave publike përmes tenderave, denoncohet për ndotjen e mjedisit, duke i depozituar ato në vende jo të miratuara.
Ndërsa më parë ishte denoncuar një skandal lidhur me denoncimin e mbetjeve në fshatin Ibë, sot kjo kompani mbetjet i hedh në Vorë.
Inertet shkarkohen nga kompania Salillari në zonat periferike të Tiranës dhe skandali thellohet edhe më shumë kur asnjv nga institucionet shtetërore nuk reagon.
Videot e dërguara në redaksinë e JOQ ALBANIA tregojnë qartë kamionët e firmës “Salillari”, të cilat dalin nga kantieri i ndërtimit në Kopshtin Zoologjik, kalojnë në Unazën e madhe dhe përfundojë në Ibë dhe Vorë.
Një ditë më parë media denoncoi këtë krim mjedisor me video, duke kapur në flagrancë kamionët e firmës “Salillari” të cilët shkarkonin inerte në Ibë. Menjëherë pas bërjes publike në media, “Salillari” nuk e ndaloi krimin mjedisor por ndërroi itinerar duke dërguar kamionët e tij të shkarkonin në mënyrë të paligjshme në Vorë.
Krimi mjedisor po ndodh dhe as IKMT, as policia bashkiake dhe as inspektorët e mjedisit nuk kanë marrë asnjë masë, përkundrazi duket se po kujdesen më së miri qe kjo vepër penale të ndodhë në mes të ditës dhe askush të mos shqetësojë “Salillarin”.
Ligji për MENAXHIMIN E INTEGRUAR TË MBETJEVE, e dënon këtë vepër penale me 2 deri në 10 vite burg, por “Salillari” ka fituar mbrojtje nga ky ligj nga vetë shteti.
Gjithçka ndodh në një kohë, kur Kryeministri paralajmëroi Kryebashkiakët lidhur me gjendjen e mjedisit në territoret që kontrollojnë. Madje ai nuk kurseu të bënte shembull kryebashkiakun e Himarës, sepse në shëtitoren e Dhërmiut kishte parë plehra.
Ndoshta këto mbeturinat në shëtitore Rama i shikon dhe ka sy të mprehtë, ndërsa kamionët e Salillarit që mbushin periferitë e Tiranës me inerte, janë të padukshëm.
