Artistët e Cirkut kanë dorëzuar në KLSH, më 22 tetor, atë që e konsiderojnë si dosjen e rrëmbimit të tokës, ku ndodhej çadra e institucionit kulturor.
KLSH informon se ditën e sotme, kryetari Arben Shehu urdhëroi në mënyrë të menjëhershme nisjen e auditimeve për të gjithë procesin e parashtruar në kërkesën e ardhur nga artistët e Cirkut Kombëtar.
Ata kërkuan një hetim të thelluar nga KLSH për të zbuluar autorët përgjegjës të zhdukjes nga duart e shtetit të një prone 1073 metra katrorë që siç thonë ata ka vlerën e 5 mln eurove.
Përmes kësaj shkrese ata kërkuan një hetim më të gjerë mbi veprimet apo mosveprimet e kryera nga Cirku Kombëtar dhe/ose Ministria e Kulturës.
Në të referohen shkelje nga ana e punonjësve të institucioneve të sipërcituara në kundërshtim me procedurën administrative të caktuar për mbrojtjen e interesave të tyre ligjore në kuadër të një procesi gjyqësor.
Gjithashtu artistët kërkuan një hetim më të thellë mbi mënyrën e menaxhimit të veprimtarisë së Cirkut Kombëtar nga ana e titullarit të këtij institucioni.
