Dy sirianë, një palestinez dhe një gjerman janë arrestuar në portin e Durrësit, ndërsa një siriane u procedua, njoftoi këtë të Hënë policia. Sirianët dhe palestinezët, sipas bluve, ishin pajisur me viza turistike false dhe tentonin të linin Shqipërinë, ndërsa gjermani akuzohet se i ka ndihmuar.
Në pranga u vunë:
A.H., shtetas gjerman, për veprat penale “Dhënie ndihme për kalim të paligjshëm të kufirit” dhe “Falsifikimi i letërnjoftimeve, pasaportave apo i vizave”;
A.A., 58 vjeç, shtetas palestinez, M. H., 33 vjeç, M. K., 46 vjeç, shtetas sirian, për veprën penale “Falsifikimi i letërnjoftimeve, pasaportave apo i vizave”.
Gjithashtu u procedua penalisht shtetasja R. F., 37 vjeçe, shtetase siriane, për veprën penale “Falsifikimi i letërnjoftimeve, pasaportave apo i vizave”.
“Këta shtetas kanë tentuar të kalojnë kufirin duke përdorur viza turistike gjermane të dyshuara të falsifikuara, me anë të ndihmës së shtetasit gjerman A.H., në Pikën e Kalimit Kufitar Porti i Durrësit, në dalje të territorit të Republikës së Shqipërisë”, njoftoi policia.
