“Shkollat nuk kanë ngrohje dhe janë mbyllur, sepse Edi Rama harxhon për ngrohjen e zyrës së tij më shumë se për ngrohjen e të gjitha shkollave të Shqipërisë”. Ka qenë ky denoncimi i Partisë Demokratike, e cila akuzon qeverinë për paaftësi dhe neglizhencë për të trajtuar problematikën e krijuar në vend si pasojë e motit të keq, e veçanërisht për mbylljen e shkollave.
“Ndërsa shkollat janë ende pa ngrohje, Rama do të harxhojë për ngrohjen e Kryeminsitrisë, plot 537 milionë lekë”, tha sot në një deklaratë për shtyp Grida Duma, Sekretarja për Marrëdhëniet me Publikun në PD.
“Në fakt, këto 537 milionë lekë janë vetëm një pjesë e vogël e mbi 13 miliardë lekë që Edi Rama do shpenzojë për vete dhe godinën e Kryeministrisë të cilën e ka kthyer në pallat argëtimi. Prioriteti kryesor i Edi Ramës është luksi për vete. Mirëqenia e njerëzve nuk ka rëndësi për të”, tha Duma.
Sipas PD, prandaj njerëzit po vdesin nga të ftohtit, sepse Edi Rama është ngrohtë në zyrën e tij.
“Ndërsa pushteti lokal mezi po përballon situatën me burimet e veta, Edi Rama jep shfaqje me shtab emergjence nga zyra e tij e ngrohtë. Ndërkohë njerëzit po e përballojnë vetë të ftohtit, po përballojnë vetë kosoton e mbajtjes së fëmijëve në shtëpi dhe mbajtjes ngrohtë të shtëpive për fëmijët. Edi Rama nuk mendon për njerëzit. ndaj, së bashku duhet ta ndryshojmë qeverinë nga qeveri e Edi Ramës në qeveri të njerëzve”, tha Duma.
