Aktori Alec Baldwin qëlloi aksidentalisht me armë gjatë xhirimeve të filimit “Rust”, duke lënë të vdekur drejtoreshën e fotografisë, Halyna Hutchins dhe duke plagosur regjisorin Joel Souz.
Përmes një postimi në “Twitter” aktori ka shprehur tronditjen dhe pikëllimin e tij të thellë për ngjarjen e rëndë të ndodhur në Nju-Meksiko.
“Nuk ka fjalë për të përcjellë tronditjen dhe pikëllimin tim në lidhje me aksidentin tragjik që i mori jetën Halyna Hutchins, një gruaje, nënë dhe kolege shumë të admiruar. Jam duke bashkëpunuar plotësisht me policinë për hetimin, që të adresojmë mënyrën si ndodhi tragjedia dhe zemra ime është e copëtuar për burrin e saj, djalin e tyre dhe të gjithë ata që e njihnin dhe e donin Halynën”, ka shkruar ai.
Në pyetje në lidhje me ngjarjen e rëndë po merren edhe aktorë të tjerë që ishin në sheshxhirim. Ende nuk është ngritur një akuzë ndaj aktorit, ndërsa hetuesit nuk kanë përcaktuar ende nëse ngjarja ishte aksidentale.
Vlen për tu theksuar se tragjedi të tilla janë të rralla në kinematografi. Kjo pasi armët që përdoren në skena filmash, janë të vërteta por pa plumba realë dhe thjesht shkrepen duke krijuar më pas efektin e zhurmës.
