Ish-anëtari i bandës së Lushnjës, Alban Semaku dyshohet se është nxjerrë në pritë nga persona, që ai i ka njohur. Akoma nuk janë identifikuar këta persona nga hetuesit.
Ka dyshime se një person i panjohur e ka transportuar Semakun në vendin ku është vrarë. Nuk përjashtohet mundësia që në makinë të ketë qenë edhe një person i seksit femër. Pasi ka arritur në vendin ku u vra, Semaku mund të jetë përballur me ekzekutuesit.
Po ashtu, dyshohet se Semaku, sapo ka parë vrasësit, ka tentuar të largohet duke ikur nga një mur, por nuk ia ka dalë të kalojë murin. Kjo gjë vërtetohet nga fakti se janë gjetur njolla gjaku në një distancë jo të vogël. Banorët kanë thënë se nuk kanë dëgjuar të shtëna, gjë që ngre dyshimet se ekzekutimi mund të jetë bërë me armë selinciator.
Pista kryesore e hetimit është ajo e larjes së vjetra të hesapeve të viktimës. Nga mënyra si është bërë vrasja, dyshohet se vrasësit janë profesionistë. Viktima është qëlluar nga afër, duke qenë përballë një vrasjeje të tipit mafioz. Vrasja ka ndodhur pranë lumit Shkumbin, në Peqin, ku viktima është qëlluar njëherë pas koke dhe tre herë në trup. Ish-anëtari i bandës së Lushnjës ka dyshime se është rrëmbyer pranë qytetit të tij, në Lushnjë. Vrasja ka ndodhur në një zonë të pabanuar.
Semaku është i fundit në radhën e anëtarëve të ish-bandës së Lushnjës që u vra me armë zjarri pranë lumit Shkumbin në zonën e Peqinit. Dy vite më parë u vra me armë zjarri një tjetër anëtar i kësaj organizate kriminale, më e madhja në vendin tonë. Më 14 dhjetor të vitit 2019 u gjet i vrarë me plumb në kokë Enver Boriçi, vëllai i Arben Boriçit, një nga anëtarët e kësaj bande, i dënuar me burgim të përjetshëm. Ndërkohë, në vitin 2016 u organizua një atentat ndaj Xhulio Shkurtit, nipi i Aldo Bares, i cili arriti të mbijetonte. Në një tjetër atentat po në Lushnjë në tetor të vitit 2018, Xhulio Shkurti arriti të mbijetonte sërish, por mbetën të vrarë Jurgen Hoxha, 22 vjeç dhe Zamir Latifi, 23 vjeç. Në momentin e ngjarjes, viktimat kanë qenë në rrugë në këmbë. Si atentatorë janë akuzuar Laert Haxhiaj dhe Orgest Bilbili (i arrestuar). Në korrik të vitit 2010 mbeti i vrarë nga një atentat Gerti Lala, një tjetër bashkëpunëtor i bandës së Lushnjës. Në atë kohë u arrestua Lart Haxhiaj dhe Orgest Bilbili, të cilët ishin adoleshentë. Lala, i njohur me nofkën “Iriqi”, u masakrua me thika përveç se u vra me armë zjarri, ku disa plumba e prekën në pjesën e kokës.
