Drejtoritë anti-korrupsion që janë të përqendruara në zyrën e Kryeministrit tashmë do të jenë në Ministrinë e Drejtësisë, në një drejtori të re të krijuar enkas. Vendimi është marrë sot në mbledhjen e qeverisë dhe është bërë i ditur nga ministri i Drejtësisë, Ulsi Manja.
Bëhet fjalë për rrjetin e koordinatorëve anti-korrupsion dhe që do të shtrihet në 47 institucione shtetërore. Ndërsa koordinator i këtij rrjeti do të jetë ministri i Drejtësisë.
“Si koordinator kombëtar kundër korrupsionit, e vlerësoj një shprehje të vullnetit të kësaj qeverie për të luftuar korrupsionin në administratën publike. Me vendimin e sotëm ridimensionohet një funksion i ri që do të jetë krijimi i një drejtorie të re anti-kurrupsion. Të gjitha drejtoritë anti-korrupsion në zyrën e Kryeministrit do të përqëndrohen në Drejtorinë Anti-korrupsion në Ministrinë e Drejtësisë”, deklaroi ministri Ulsi Manja.
