Kryeministri Edi Rama u shpreh mbrëmjen e sotme në emisionin “Now” në EuronewsAlbania, se studentët duhet të vaksinohen.
Rama u shpreh se duhet të përdoren mënyrat e buta për ti bindur studentët të vaksinohen, pasi ky është një proces.
“Normalisht studentët e pavaksinuar nuk duhet të lejohen në auditore, por Qeveria nuk mund të çojë policinë në Universitete për të nxjerrë jashtë studentët”, tha Rama.
Kreu i Qeverisë u shpreh se në Shqipëri është ndjekur një politikë shumë liberale lidhur me vaksinimet.
“Fakti që ne kaluam një sezon vere me një nivel shumë të ulët infektimesh dhe ndoshta kjo ka krijuar atë idenë se këtu nuk ka problem.
Numri i fataliteteve është mbi 95 % me persona të pavaksinuar, ndërsa ata që kanë humbur jetën kur kanë qenë të vaksinuar, kanë pasur probleme të tjera me shëndetin, sëmundje të tjera, si në rastin e ish-Sekretarit të Shtetit, Colin Powell”, tha Rama.
Lidhur me faktin se në stadium lejohen tifozë të pavaksinuar, Rama tha se kjo është detyrë e FSHF për të bërë kontrollet.
“Nuk e di a janë bërë kontrolle dhe si janë bërë, por i takon organizatorëve të ndeshjeve që të bëjnë kontrolle”, tha Rama.
Ai shtoi se detyra e Qeverisë është të sigurojë vaksinat, të realizojë vaksinimet, por ne kemi ecur me një politikë liberale.
“Ku ka pasur më shumë vaksinime ka pasur edhe rregulla më të forta”, tha Rama. Ai u shpreh se në shtete të caktuara janë aplikuar masa që nuk lejohet të futesh as në lokale, as në restorante, as në supermarkete, pa treguar “green pass”.
