Kuvendi miratoi sot ngritjen e Komisionit Hetimor për zgjedhjet e 25 prillit, ndërsa ai për Bechetti-n i kërkuar gjithashtu nga opozita nuk ka marrë votat e nevojshme për miratim.
Komisioni Hetimor për zgjedhjet e 25 prillit, që do të drejtohet nga opozita, u votua me 120 vota pro.
Ndërsa ai për Bechetti-n i kërkuar gjithashtu nga opozita nuk do të ngrihet pasi u votua me 77 vota kundër dhe 43 pro.
Ndërkohë për hetimit parlamentar për Inceneratorët, Kuvendi do të shprehet seacën e ardhshme, pas kërkesës së depozituar nga socialistët.
“Lidhur me procedurat e ndjekura për impiantet e trajtimit të mbetjeve, dua të informoj se kemi komunikuar me PD për të detajuar objektin e punës hetimore në Komision. Do të doja që votimi të shtyhet në seancën pasardhëse me besimin se deri në seancën pasardhëse do ta kemi detajuar plotësisht objektin e hetimit”, tha Balla.
Ndërkohë që Sekretari i Përgjithshëm i PD, Gazmend Bardhi, tha se ka pasur një tentativë të qartë të PS-së për të penguar ngritjen e Komisionit Hetimor, duke theksuar se janë dakord që votimi të shtyhet për javën tjetër.
“Sot jemi informuar për një kërkesë të grupit të PS , dhe ne biem dakord që votimi i këtij Komisioni të shtyhet për javën tjetër”, u shpreh ai.
