Qeveria vendosi sot të shpallë gjendjen e emergjencës së energjisë. Ndërkohë që u publikuar një vendim me 6 pika, ajo që bie në sy është fakti se Kryeministri Edi Rama, ka pranuar ose ka kopjuar një prej propozimeve të bëra nga kreu demokrat Lulzim Basha, në një dokument me 7 pika.
“Gjendja e emergjencës në furnizimin me energji elektrike i shtrin efektet deri më 15 prill 2022”, është pika e propozuar nga Basha dhe që siç duket është pranuar ose kopjuar nga Rama.
Kjo u pohua edhe në konferencën për mediat nga deputetja demokrate Jorida Tabaku, e cila tha se Rama pavarësisht se kundërshton, del edhe kopjon pikat e propozuara nga PD.
Ndërkohë, kreu demokrat Lulzim Basha, duke shprehur qëndrimin politik të PD tha se ka qenë i qartë.
“Sa herë kemi folur për energjinë, subvencionimi i cmimit ka të bëjë me kategoritë në nevojë, jo me atë që sot është i rritur. Ka qenë 7.4 shkoi 9.4 një zot e di sesi i bëjnë hesapet dhe me kë po i bëjnë me tigrin e me kë dreqin po e bëjnë.
Kur flasim për subvencionim flasim për një platformë që e kemi shpallur shesh me shesh, qytet më qytet që prej 7 vitesh. Që nga tetori i 2014 që i mblodhëm shqiptarët në protestë pasi u rrit cmimi i energjisë.
Të subvencionihet ky cmim jo ai që ishte se ne e dimë sa del nga kasakada. Do thoni jo po OST jo po OSSH jo po humbjet në rrjet, shumica në fakt janë vjedhje. Sa i përket rritjes së çmimit sigurisht që jemi kategorikisht kundër”, tha Basha.
