Gledis Nano ka marrë detyrën si Drejtori i Përgjithshëm i Policisë së Shtetit, në një ceremoni të zhvilluar këtë të Enjte.
Në fjalën e tij, Gledis Nano tha se qytetarët presin nga Policia e Shtetit standarde të tjera reagimi dhe sjelljeje në zgjedhjen e shqetësimeve të tyre dhe shtoi se “ne do bëjmë ç’është e mundur për t’i arritur”.
“Në këtë çast solemn në shenjë nderimi detyrimi dhe respekti për gjakun e punonjësve të policisë, ne emër të të gjithë punonjësve të policisë së Shtetit, në nderin tim personal, betohem për të mbajtur me nder flamurin e Policisë së Shtetit. Betohem! Besimi i kësaj detyre përveç privilegjit më ngarkon me përgjegjësi për të qenë ne lartësinë e detyrës. Profesioni im nuk ishte një zgjedhje karriere, por pasion i frymëzuar nga babai im, ish-oficer policie. Në këto dekada kam kuptuar se ky institucion është një pjesë kryesore e jetës sime që kërkon angazhim të lartë”, tha Nano.
“Sfidat për policinë janë të shumëfishta. Qytetarët presin nga Policia e Shtetit standarde të tjera reagimi dhe sjelljeje në zgjedhjen e shqetësimeve të tyre dhe ne do bëjmë ç‘është e mundur për t’i arritur. Kërkoj prej tyre ta konsiderojnë organizatën tonë si një partner. Roli i tyre është i pazëvendësueshëm në punë tonë. Prioriteti im, intensifikimi i bashkëpunimit me të gjitha agjencitë ligjzbatuese dhe partnerët. Një polici më e trajnuar. Dua t’i uroj çdo kolegu suksese në përmbushjen e detyrës. Kërkoj angazhimin tuaj maksimal në realizimin e detyrave sipas betimit që kemi bërë”, shtoi ai.
