Presidenti rus Vladimir Putin deklaroi sot se Europa është fajtore për krizën aktuale të energjisë, pasi çmimet e larta të gazit nxitën akuzat se Moska po ndalon furnizimet për të bërë presion ndaj Perëndimit.
“Ata kanë bërë gabime”-tha Putin në një takim televiziv me zyrtarët rusë të energjisë. Ai tha se një nga faktorët që ndikuan në rritjen e çmimeve ishte përfundimi i “kontratave afatgjata” në favor të tregut vendor.
Çmimet evropiane dhe britanike të gazit u rritën të mërkurën me më shumë se 25%, e nxitur edhe nga rritja e kërkesës para se të nisë stina e dimrit.
‘Komisioni Evropian bëri një gabim kur donte të hiqte dorë nga kontratat afatgjata dhe iu drejtua tregtisë së gazit në bursë. Praktika e partnerëve tanë evropianë ka konfirmuar edhe një herë se ata bënë gabime. Ne ende po flisnim me përbërjen e mëparshme të Komisionit Evropian dhe e gjithë politika e tij ishte të hiqte qafe të ashtuquajturat kontrata afatgjata. Ata po përballeshin me kalimin në tregtinë e aksioneve të gazit dhe vërtetuan se sot është absolutisht e qartë se kjo politikë është e gabuar. Si rezultat, çmimi i gazit natyror ka thyer të gjitha rekordet historike: sot po afrohet 2,000 dollarë për mijë metra kub, që është më shumë se dhjetë herë më e lartë se çmimi mesatar i vitit të kaluar’, u shpreh Putin.
Kritikët kanë akuzuar Moskën për kufizimin e qëllimshëm të furnizimit me gaz në Evropë, në përpjekje për të shpejtuar nisjen e Nord Stream 2, një tubacion i diskutueshëm që lidh Rusinë me Gjermaninë. Më herët të mërkurën, zëdhënësi i Putinit, Dmitry Peskov i mohoi këto pretendime. “Para së gjithash ne këmbëngulim që Rusia nuk ka dhe nuk mund të ketë ndonjë rol në atë që po ndodh në tregun evropian të gazit. Rusia ka përmbushur, po përmbush dhe do të vazhdojë të përmbushë me përgjegjësi të gjitha detyrimet e saj sipas kontratave ekzistuese”-u tha Peskov gazetarëve.
Gjiganti energjetik rus Gazprom njoftoi muajin e kaluar se tubacioni prej 10 miliardë eurosh ishte përfunduar dhe Kremlini ka thënë se nisja e tij do të ndihmojë në luftimin e krizës energjetike në Evropë.
