Një ditë pasi ngriti shqetësimin e bllokimit të akseve që lidhin Pukën me Kukësin e Tropojën dhe akuzoi Ministrinë e Transporteve se firmat nuk punojnë, Pjerin Ndreu është shfaqur sot në krah të ministrit të Transporteve Sokol Dervishaj.
Ky i fundit ka shkuar pikërisht në rrugën Pukë-Tropojë në Qafë Mali, pikërisht në aksin që sipas deputetit të PS ishte i bllokuar.
Por, foto e mëposhtme tregojnë se lëvizja e automjeteve në këtë segment mund të bëhet me zinxhirë dhe nuk ka rrugë të bllokuar. Ndërsa deputeti i PS që dje akuzoi ministrin e LSI mesa duket po pranon në heshtje gabimin e tij.
“Të gjitha akset kombëtare dhe ky aks janë të hapura. Nuk duhet të harrojmë se jemi në kushte dimri, dhe shoferët duhet të kenë kujdes në zona të caktuara. Jemi në gadishmëri maksimale bashkë me institucione të tjera policinë, emergjencat dhe Bashkitë. Në perfundim të situatës do të bëjmë edhe një vlerësim si u bë përballimi situatës nga gjithë faktorët. Probleme ka pasur në rajon dhe në Europe”, ka thënë ministri i Transporteve.
