Një sasi prej 2 kg e 400 gramë eksploziv u sekuestrua nga policia në Kukës, që arrestoi një person dhe shpalli në kërkim një tjetër.
Ngjarja
“Shërbimet e Komisariatit të Policisë Kukës, bazuar në informacione të siguruara në rrugë operative se në një mjet kishte lëndë plasëse eksploziv, kanë organizuar punën për lokalizimin dhe ndalimin e mjetit. Shërbimet e Policisë kanë lokalizuar në afërsi të fshatit Myç-Mamëz, mjetin tip ‘Benz’ me të cilin udhëtonin shtetasit K.N. dhe Sh.R. Drejtuesi i mjetit shtetasi, Sh.R., sapo ka parë shërbimet e Policisë, ka braktisur automjetin dhe ka mundur të largohet. Gjatë kontrollit të ushtruar në automjet u gjetën dhe u sekuestruan në cilësinë e provës materiale 2 kg e 400 gramë lëndë plasëse e dyshuar eksploziv. Në vijim të veprimeve u bë arrestimi i shtetasit K. N., 31 vjeç, banues në fshatin Qinamak, i cili ishte pasagjer në automjetin ku u gjet lënda eksplozive. Gjithashtu u bë shpallja në kërkim e shtetasit Sh.R., 30 vjeç, banues në fshatin Qinamak dhe vijon puna intensive për kapjen e tij”, njoftoi policia.
Materialet hetimore u referuan në Prokurorinë e Rrethit Gjyqësor Kukës, për veprën penale “Prodhimi dhe mbajtja pa leje e armëve, municioneve luftarake apo lëndëve plasëse”, kryer në bashkëpunim, shtuan të njëjtat burime.
