“Pandora Papers”/ Zbulohen emrat e tre VIP-ave të përfshirë në skandal

Mes politikanëve e liderëve botërorë, në dosjet e Pandora Papers ka edhe personazhe të njohur showbizi e sporti.

Mësohet se deri më tani janë zbuluar vetëm tre prej tyre. E para është këngëtarja kolumbiane Shakira, emri i plotë i të cilës është Shakira Isabel Mebarak Ripoll. Avokati i Shakirës tha, që llogaritë e saj ‘offshore’ janë të deklauara dhe nuk i kanë sjellë asaj ndonjë avantazh përsa u përket tatimeve.

Një tjetër personazh është ish-super ylli i cricket-it, Sachin Tendulkar, nga India. Avokati i këtij të fundit nuk u është përgjigjur pyetjeve të gazetarëve.

Personazhi i tretë është supermodelja Claudia Schiffer. Përfaqësuesit e Schiffer thanë se supermodelja i paguan saktë taksat e saj në Mbretërinë e Bashkuar, ku dhe jeton.

‘Pandora Papers’ përfshin 11.9 milionë skedarë nga kompanitë e punësuara nga klientë të pasur për të krijuar struktura offshore në parajsat tatimore si Panamaja, Dubai, Monako, Zvicra dhe Ishujt Kajman.

‘Pandora Papers’ konsiderohet rrjedhja më e madhe ndonjëherë e të dhënave në offshore, që nxjerr në dritë sekretet financiare të të pasurve dhe të fuqishmëve nga e gjithë bota.

Parajsat fiskale janë vende, ku taksat janë shumë të ulëta ose nuk ekzistojnë fare dhe ligjet tatimore janë shumë të lehtë.

Nga ky vërshim dokumentesh dalin kasafortat e fshehta të 46 oligarkëve rusë, kompanitë offshore me zero taksa të një super kaste prej 130 multi-miliarderësh, llogari offshore të mbi 330 politikanëve, mes të 35 krerë shtetesh ose qeverish, ministra, parlamentarë, gjeneralë, bankierë, industrialistë, të famshëm nga sporti, moda dhe argëtimi.