Ministrja e Arsimit Evis Kushi njoftoi pasditen e së premtes rikthimin në normalitet të mësimit në shkolla, ku orët do të zhvillohen 45 minuta dhe procesi mësimor do të jetë pa turne, sikundër nisi ky vit shkollor.
Por një mesazh që ka qarkulluar në grupet e arsimtarëve tregon se vendimi i Kushit ka qenë nën presionin e peticionit të prindërve që kërkonin zhvillimin normalisht të mësimit, edhe pse bazuar në urdhërat e Komitetit Teknik të Ekspertëve nuk ka ndryshime të rregullave.
Në mesazhin e mëposhtëm, i cili është shpërndarë mbrëmjen e së premtes, i kërkohet stafeve mësimore, pra mësuesve, që të marrin masa gjatë fundjavës lidhur me ndryshimet, madje duke i kërkuar që mos ketë pushime në fundjavë. Një mesazh urdhërues që tregon se rikthimi i normalitetit në shkolla do të mbetet thjesht e vetëm, një zgjidhje emergjente, e cila mund të ndryshojë në javët në vijim.
Madje mësuesit paralajmërohen se do të jenë në fokus nga të gjitha anët ditën e hënë, ndërsa u kërkohet që orari mësimor të publikohet në faqen e rrjetit social të shkollës ditën e sotme. Kjo tregon se vendimi i Kushit, i konsideruar si një rikthim në normalitet, është marrë nën presionin e peticionit që kishte nisur të firmosej nga prindër të shkollave të ndryshme në Tiranë dhe nuk ka pasur asnjë diskutim apo gadishmëri për rikthimin në normalitet bazuar në të dhënat, apo marrjen e masave në kushtet kur vendi vijon të përballet me rastet e shumta të pandemisë.
