Presidenti i Serbisë, Aleksandër Vuçiç, ka reaguar pas zbatimit të marrëveshjes për targat të arritur në Bruksel mes dy vendeve dhe ka shprehur skepticizmin e tij lidhur me respektimin e marrëveshjes nga pala kosovare.
Vuçiç, ndër të tjera, siç raportojnë mediet serbe, ka folur edhe për Asociacionin e Komunave me kompetenca ekzekutive ku ka deklaruar se nuk beson asgjë pasi e di me kë ka të bëjë. Sipas Vuçiç, pas shpalljes së pavarësisë së Kosovës, ata mezi po qëndrojnë.
“Nuk besoj se do e pranojnë Asociacionin. Nuk u besoj në asgjë sepse e di me kë kemi punë. Kurti ka thënë se Kosova e ka një problem të madh, që tashmë ka emër e mbiemër (Aleksandër Vuçiç). Nuk ka asnjë marrëveshje të lehtë për ne. S’ka asgjë të lehtë në Kosovë. Më 2008, ata shpallën pavarësinë dhe ajo njihet nga 90 për qind e shteteve të fuqishme. Që nga ajo kohë, mezi po e mbajmë hundën mbi ujë”, është shprehur ai.
