Aktivistja e Lëvizjes për Universitetin, Mirela Ruko është thirrur sot në Prokurori, për të dhënë dëshminë e saj, për salcën mbi ministren e Arsimit, Lindita Nikolla. Mirela Ruko tregon se nuk është nën hetim, por u pyet si një person që ka dijeni për ngjarjen.
“Unë jam thirrur sot në Prokurori dhe jam pyetur rreth ngjarjes, si një person që ka dijeni për atë që ndodhi. Nuk jam person i akuzuar dhe nuk jam nën hetim. Normalisht, ministrja e arsimit Lindita Nikolla nuk mund të ngrejë padi ndaj meje, pasi veprimi im nuk ishte personal, ishte goditje për shkak të detyrës.
Nuk e di nëse do të thirrem sërish apo do nëse do të ngrihen akuza ndaj meje. Kjo është në dorë të Prokurorisë dhe hetimet po vazhdojnë”, thotë Mirela. Nderkaq, e pyetur nga dritare.net nëse është penduar për salcën ndaj ministres, ajo shprehet: “Lindita Nikolla është shprehur se kjo gjë do e shoqërojë gjithë jetën. Të njëjtën gjë them edhe unë, ishte një veprim që do më ndjekë gjithë jetën.
Si një akt i guximshëm dhe i drejtë. Asgjë në jetën time nuk ka ndryshuar pas atij akti dhe ne vazhdojmë të jemi të vendosur për të vazhduar në rrugën tonë. Miqtë e mi janë me mua dhe më shoqëruan edhe sot në Prokurori. Ne do të vazhdojmë me kërkesat tona”, thotë aktivistja.
Ngjarja ndodhi më 17 nëntor në aktivitetin e Ditës Ndërkombëtare të Studentëve. Aktivistja Ruko iu afrua ministres Nikolla dhe hodhi mbi të salcë, në shenjë proteste ndaj reformave në Arsimin e Lartë. Ruko tregoi në emisionin “Dritare me Rudinën”, se prej kohësh mbikqyrnin lëvizjet e ministres për të realizuar aktin e tyre.
Atë ditë unë isha në pozicionin e duhur, por nuk isha e vetmja që kisha marrë salcë me vete”. Ruko u arrestua nga Policia dhe u lirua pas 10 orësh qëndrimi në Komisariatin Nr. 1. Ngjarja bëri shumë bujë, duke vënë palët pro e kundër, përballë, ndërsa vetë ministrja Nikolla e kaloi me sportivitet. Ajo rrëfeu me humor, në studion e Eni Vasilit, se salca e kishte bërë me të shijshme./dritare.net/
