Së fundmi ish-deputeti i Partsë Socialiste, Koço Kokëdhima, ka filluar një fushatë mediatike, ku ai kumbëngul se në themel të qëllimeve të tij është ristrukturimi i PS-së apo një revolucion i brendshmën, me nuanca anti-establishment. Kjo “dashamirësi” e Kokëdhimës, për të mirëfunksionimin e Partisë Socialiste, vjen pasi Gjykata Kushtetuese i hoqi mandatin e deputetit.
I pyetur në emisionin “Fakt” nëse ishte refuzuar nga kryesocialisti Rama për të marrë pozicionin e Sekreterit të Përgjithshëm në PS, ish-deputeti Kokëdhima ka arritur deri aty sa të thotë se kurrë nuk e ka dashur këtë pozicion.
Ndoshta, Kokëdhima shumë mirë mund të japë kontributin e tij si një anëtarë i thjeshtë i PS-së, duke shkuar derë më derë, e duke ndarë fletushka të “Rilindjes”, gjatë fushatës së zgjedhjeve parlamentare. Ai gjithmonë ka lënë të kuptohet se do që të jetë pranë bazës së partisë.
Më poshtë pjesë nga intervista e ish-deputetit Kokëdhima në emisionin “Fakt”, të moderatorit Çim Peka.
Çim Peka: Meqë jemi këtu a është e vërtetë se lëvizja juaja ka filluar atëherë kur z. Rama refuzoi që ju të zinit vendin e Gramoz Ruçit?
Kokëdhima: Shiko, më fal se nuk dua t’ju vë dhe juve në radhën e atyre që spekulojnë. Ky është një spekulim shumë i madh.
Vjen nga arsenali i intrigave dhe intrigantëve të politikës. Kurrë në nuk kam pasur interes për tu zgjedhur Sekretar i Përgjithshëm në PS. Nuk kam pasur interes as për t’u zgjedhur kryetar. Kam pasur në plan të konkurroj vetëm për anëtar të kryesisë së PS.
Dhe madje, Edi Rama ka dijeni të plota që asnjëherë nuk kam aspiruar për t’u zgjedhur në këtë vend të Gramoz Ruçit. Me Ruçin kam bashkëpunuar në mënyrë shumë të sinqertë. Kam qenë gjithmonë i sinqertë në bashkëpunimin tim si me atë dhe me kolegët e tjerë. Unë I kam propozuar Edi Ramës vetëm një gjë; që posti i Sekretarit të Përgjithshëm të zgjidhej me konkurrencë të hapur. Madje, për të qenë shumë i sinqertë kam propozuar edhe emra konkretë. Kam propozuar Lindita Nikollën dhe Blendi Çuçin si kandidatura të mundshme që të konkurronin për Sekretarë të Përgjithshëm.
Ai post është shumë i rëndësishëm sidomos kur partia është në qeverisje dhe kryetari i partisë është shumë më i preokupuar me qeverisjen. Një person i ri dhe i update-uar me aftësi të mira do ta ndihmonte shumë partinë, për t’u riogranizuar, për t’u reformuar.
