Viti ka filluar me këmbë të mbarë për tregun e peshkut të Cukixhit në Tokio, ku peshku i parë ton i kuq për vitin 2017 u shit për 74,20 milionë jen (605 000 euro), çmimi më i lartë që prej rekordit të vitit 2013.
Për herën e gjashtë rradhazi, është pronari i zinxhirit të restoranteve “Sushizanmai”, Kiyoshi Kimura, që e fitoi këtë ankand.
“Është i shtrenjtë”, tha ai para kamerave të televizionit.
Kur i kujtuan fjalët që kishte thënë herën e kaluar se do të ishte hera e fundit që blinte peshk kaq të shtrenjtë, ai u shpreh se “nuk do e thotë më këtë”.
Sipas çmimit të paguar për këtë ton prej 212 kilogramësh, një sushi i përbërë nga një fileto e nxjerrë nga dhjami i barkut që quhet “otoro” duhet të shitet rreth 10 000 jen (81 euro), por 51 restorantet “Sushizanmai” do ta mbajnë në të njëjtën tarifë si zakonisht, 3,50 euro.
Në restorantet luksoze të Tokios një pjatë e tillë mund të arrijë deri në 3 000 jen (24 euro).
Kjo shitje në ankand ndoshta do të jetë e fundit këtë vit të ri në Cukixhi, treg historik në zemër të kryeqytetit që pas 80 vitesh histori dhe shumë peripecishë, do të zhvendoset, në fund të vitit diku në gjirin e Tokios.
