Ndërhyrja e mjeteve borëpastruese në Rrugën e Kombit u bë e domosdoshme, pas situatës së rënduar meteorologjike në vend. Për të ndjekur nga afër punën e autoriteteve për zhbllokimin e këtij aksi të rëndësishëm, i pranishëm ishte vetë ministri i Transportit dhe Infrastrukturës, Sokol Dervishaj.
Ministri informoi mbrëmjen e së enjtes nga Kukësi se situata është e vështirë për shkak të reshjeve të dendura të dëborës.
Ai deklaroi se megjithë kushtet e vështira nga reshjet e borës dhe ngricave në vend për shkak të uljes së temperaturave, nuk ka asnjë mjet të bllokuar.
Ministri tha se kontraktorët po punojnë papushim për pastrimin e akseve të bllokuara por shtoi se ka rënie më me intensitet të reshjeve.
“Pavarësisht kushteve klimaterike, janë marrë të gjitha masat.Por asnjë mjet nuk duhet të qarkullojë në Rrugën e Kombit pa zinxhirë. Ndaj u bëj thirrje qytetarëve të shmangin kalimin në këtë aks”, tha ministri Dervishaj.
Ai informon gjithashtu se pavarësisht situatës asnjë aks kombëtar nuk është i bllokuar.
