Sopranoja Inva Mula deklaroi së fundmi se nuk kishte marrë një ftesë zyrtare për të qenë pjesë në mbrëmjen Gala të Inaugurimit të Rikonstruksionit të Teatrit Kombëtar të Operas dhe Baletit.
TKOB ka reaguar në një postim në faqen zyrtare në Facebook dhe ka mohuar kategorikisht këtë fakt, ndërsa thekson se nëpërmjet Drejtoreshës Artistike, Abigeila Voshtina, i është dërguar edhe Inva Mulës ftesat zyrtare për pjesëmarrjen në programin artistik.
Sipas këtij institucioni, këto ftesa zyrtare, janë përsëritur tre herë, duke filluar nga data 11 nëntor 2019, pasi TKOB ka patur në planet e veta që atëherë realizimin e Mbrëmjes Gala të Inaugurimit, plane të cilat janë shtyrë për shkaqe madhore si: tërmeti i nëntorit 2019 dhe më pas situata Covid 19.
Po ashtu TKOB ka publikuar edhe mesazhet dhe email-et e dërguara në tre periudha të ndryshme. Email-i i fundit zyrtar nga Drejtoresha Artistike e TKOB, Abigeila Voshtina është dërguar në adresë të sopranos më 19 korrik të këtij viti.
“Sqarojmë gjithashtu se një muaj përpara ftesës së fundit zyrtare të bërë nga Drejtoresha Artistike, znj. Voshtina (në email-in e datës 19 KORRIK 2021), Drejtoresha e Përgjithshme e TKOBAP-së, znj. Zana Çela i ka dërguar në datë 14 QERSHOR 2021 një mesazh shoqëror në WhatsApp, znj.Mula, por edhe në këtë rast nuk ka patur asnjë përgjigje. Më poshtë gjeni të renditur sipas datave ftesat zyrtare në email dhe mesazhin.”, -thuhet në reagimin e TKOB.
