Kryetari i Partisë Demokratike Lulzim Basha zhvilloi mëngjesin e sotëm homazhe tek memoriali i Azem Hajdarit, me raston e 23-vjetorit të vrasjes së tij para selisë së vjetër të PD.
Ajo që tërhoqi vëmendjen ishte fakti se Basha shoqërohej nga ekipi i ri drejtues i PD, ndërsa ka munguar për herë të parë krah tij, për të paktën 12 vitet e fundit ish-Kryeministri Sali Berisha, por edhe familja Hajdari.
Basha ndau në rrjetin social foto nga ky aktivitet, por edhe një mesazh të shkurtër për Hajdarin.
Por duket se shumë prej ndjekësve të tij në rrjet nuk ia falin vendimin për përjashtimin e Sali Berishës nga Grupi Parlamentar, edhe pse kreu demokrat në momentin që e bëri publik tha se ishte “vendimi i jetës së tij, shumë i vështirë, por i pashmangshëm”.
Komentuesit e quajnë tradhëtar, frikacak dhe person që shkatërroi Partinë Demokratike, ndërsa i kërkojnë dorëheqjen.
