Ish-Kryeministri Sali Berisha u shpreh mbrëmjen e sotme në emisionin “Now” se Partia Demokratike ka kërkuar provat dhe faktet lidhur me akuzat që më bëhen mua në vendimin për shpalljen “non grata” nga DASH.
Berisha tha se PD do të bënte një gabim historik nëse nuk do t´a përjashtonte nga rradhët e saj, nëse do të kishte provat dhe faktet në dispozicion.
“PD ka kërkuar transparencë, asgjë më shumë. Unë jam deputet i PD, nuk jam i pavarur, ndaj dhe kush e njeh parlamentarizmin, nuk mund të pretendojë se unë mund të hyj në Parlament si i pavarur”, tha Berisha.
Ai madje paralajmëroi se nëse do të merrej një vendim për përjashtimin nga grupi parlamentar, pa pasur prova dhe fakte, do të ndërmerrte çdo vendim dhe veprim, brenda kuadrit ligjor dhe kushtetues, për t´a kthyer PD në një parti sikundër ka qenë, partia e parimeve.
“Kam pasur dhe kam influencë shumë të fuqishme në PD dhe kjo buron nga fakti se unë kam mbrojtur interesat e asaj partie dhe demokratëve me vendosmërinë më të madhe. kam denoncuar më shumë se kushdo tjetër në Shqipëri krimin e organizuar, korrupsionin e të gjitha niveleve dhe kam mbrojtur interesin kombëtar”, tha Berisha.
