Demokracia jonë, shteti ynë i së drejtës dhe vlerat tona janë kundërpërgjigjja jonë më e fortë ndaj terrorizmit, ishte një nga mesazhet kyç të diskutimit të kancelares gjermane, Anglea Merkel në fjalimin tradicional të Vitit të Ri, që po transmetohet në orare të ndryshme nga shumica e televizioneve gjermane.
Kancelarja sulmoi në këtë fjalim edhe populizmin duke nënvizuar rolin e madh të Evropës në këto problematika.
Merkel u bëri thirrje gjermanëve për optimizëm, pavarësisht të gjitha kërcënimeve të terrorizmit islamik.
Shefja e qeverisë gjermane foli më pas edhe për sfidën e populistëve kundër demokracisë parlamentare dhe Evropës duke mbrojtur kompleksivitetin e kësaj çështjeje në nivel evropian.
“Po, Evropa është e ngadaltë dhe e lodhur, u detyrua të pranonte dhimbje të thella siç ishte largimi i një prej anëtareve të saj”, theksoi Merkel duke iu referuar Brexit-it.
”Por, gjermanët nuk duhet të kenë iluzione nga ideja se një e ardhme e lumtur mund të gjendet në zgjidhje të njëanshme kombëtare”, shtoi kancelarja.
