Nxënësit e klasës së mësuesit që u arrestua javën e shkuar për dhunë kërkojnë rikthimin e tij në mësim. Ndërkohë që mësuesi i shkollës fillore të Orzhanovës në Bulqizë, Agim Muça, u la nga gjykata në arrest shtëpie, janë fëmijët dhe prindërit e tyre që mund ta lehtësojnë pozicionin e tij.
Bëhet fjalë për nëntë nga 12 nxënësit e shkollës fillore të Orzhanovës. Mësohet se prindër e nxënës u kanë dhënë deklarata me shkrim familjarëve të Muçës, ndërkohë kjo kërkesë i është bërë me dije përgjegjëses së Zyrës Arsimore të Bulqizës, Bedrije Manjani, gjatë një takimi që ajo ka pasur me banorë të fshatit të largët, shkruan Panorama. Sokol Muça, djali i Agim Muçës, tha se çdo ditë në familjen e tyre ka vizitorë të shumtë.
“Edhe dje në shtëpinë tonë kemi pasur shumë mysafirë. Na ka lënë mbresa ardhja e nëntë nxënësve të shkollës Orzhanovë, bashkë me prindërit e tyre. Nuk e prisnim këtë surprizë. Ata na thanë se kanë nënshkruar deklarata me shkrim, ku shprehen se babai nuk i ka dhunuar dhe kërkojnë rikthimin e tij në shkollë”, pohoi Sokol Muça per Panoramen.
Këto deklarata do t’i vihen në dispozicion avokatit të Agim Muçës dhe Zyrës Arsimore të Rrethit Bulqizës. Nga ana e avokatit do të përdoren për të mundësuar pafajësinë e mësuesit të akuzuar për dhunë ndaj nxënësve të shkollës, ndërsa Zyrës Arsimore për të rishikuar vendimin e mëparshëm që e largoi Agim Muçën nga sektori i arsimit. “9 prindërit dhe fëmijët e tyre na thanë se janë të gatshëm të kërkojnë kudo rikthimin e Agimit në shkollë, aty ku ka punuar për shumë vite me radhë.
Këtë gjë ata ia thanë dje, gjatë një takimi në mjediset e shkollës Orzhanovë edhe Bedrije Manjanit, përgjegjëses së Zyrës Arsimore Bulqizë. Ajo nuk është prononcuar në lidhje me kërkesën e prindërve dhe nxënësve”, tha djali i Agim Muçës. Ai shkon më tej kur shprehet se 9 fëmijët e kësaj shkolle i kanë thënë Manjanit se në qoftë se nuk rikthehet mësuesi Agim Muça në shkollë, ata do ta ndërpresin mësimin. Ngjarja u raportua nga policia lokale më 10 mars të këtij viti, ndërsa thuhet se ajo ndodhi më 4 mars.
Fillimisht njëri nga prindërit e nxënësve i dërgoi një letër ZA Bulqizë dhe pastaj denoncoi në Polici 63-vjeçarin Agim Muça. Zyra Arsimore vendosi shkarkimin e tij nga puna, ndërsa Policia bëri arrestimin e tij. Më 14 mars Gjykata e Rrethit Gjyqësor vendosi lirimin e mësuesit nga burgu dhe hetimin e tij në “arrest shtëpie”. Ndërkohë, në lidhje me deklarimet e dy familjeve që akuzojnë mësuesin se ka dhunuar tre nxënës, familja Muça nuk prononcohet, por hamendëson se “dikush” qëndron pas akuzave të pavërteta dhe dashakeqe.
(Boldnews)
