Berat Gjimshiti ishte një nga dy lojtarët e kombëtares që folën në konferencën për shtyp nga Varshava në prag të ndeshjeve eliminatore.
Një kolonë e mbrojtjes së Atalantës, lojtari shqiptar tregoi se është gati për një sezon të ri me zikaltërit e për më tepër me Shqipërinë.
“Ishte një verë e gjatë për mua, kemi patur shumë ndeshje me klubin dhe kombëtaren dhe tani nisim një sezon të ri. Me Shqipërinë kemi bërë gjëra të mira, duhet të marrim pikë në këto ndeshje që kemi radhazi. Sigurisht që mund të marrim rezultat pozitiv me Poloninë, kemi bërë hapa pozitiv dhe ne duhet të shikojmë veten në këto ndeshje”.
I pyetur për përballjen e parë me Poloninë, Gjimshiti e pranoi se janë ekip i fortë dhe se do ta ketë të vështirë ndaj Lewandowskit por ai pranoi se askush nuk ka frikë nga kjo përballje.
“Do të japim maksimumin për të fituar edhe pse Polonia ka disa lojtarë të klasit botëror. Nuk ka shumë për të studiuar Lewandowskin, është në super formë. do të jetë një duel shumë i bukur me të. Do të jap maksimumim tim dhe në fund do të shikojmë si do të përfundojë. Frikë? Nuk ka frikë në futboll, kush ka frikë nuk mund të luajë në këto nivele. Kur luan në një nivel kaq të lartë rritet edhe vetëbesimi e të gjithë në skuadër tani kanë një eksperiencë më të madhe. Mendoj se çdo fitore të jep motivim më të madh, me këdo skuadër që të fitosh. Jam i lumtur që do të kemi tifozët në stadium në ndeshjet e radhës, është një plus për ne. Atalanta? Cdo vit dua të përmirësohem dhe të mësoj nga ato që nuk kam bërë mirë. Duam të shkojmë sa më lart”, përfundoi mbrojtësi kuqezi./oranews
