Dy persona vdiqën pasi morën injeksionet e vaksinës Moderna, tha të shtunën Ministria japoneze e Shëndetësisë.
Dy viktimat, të moshës 30-vjeç vdiqën këtë muaj brenda disa ditësh nga marrja e dozave të dyta të vaksinës Moderna, sqaroi më tej ministria, e cila theksoi se këto ngjarje janë nën hetim.
Japonia ndaloi përdorimin e 1.63 milionë doza të Moderna-s, të dërguara në 863 qendra vaksinimi në të gjithë vendin, më shumë se një javë pasi shpërndarësi vendas, “Takeda Pharmaceutical Co”, mori raporte se në vaksina kishte ndotës.
“Në këtë kohë, ne nuk kemi asnjë dëshmi se këto vdekje janë shkaktuar nga vaksina Moderna COVID-19”, thanë në një deklaratë të shtunën vetë kompania Moderna, ku u theksua se është e rëndësishme të kryhet një hetim zyrtar për të përcaktuar nëse ka ndonjë lidhje.
Qeveria gjithashtu ka thënë se asnjë çështje sigurie ose efikasiteti nuk ishte identifikuar dhe pezullimi i tre grupeve të Moderna ishte një masë paraprake.
