Ambasada e SHBA ka bërë thirrje qytetarëve amerikanë të mos shkojnë në aeroport, për shkak të kërcënimeve të sigurisë në aeroportin e Kabulit.
“Qytetarët amerikanë që janë në portën Abbey, porta Lindore, porta Veriore ose porta e Ministrisë së Brendshme të Re tani duhet të largohen menjëherë”, shkruhet në njoftimin e faqes zyrtare të ambasadës amerikane.
Ndërkohë, zyrtarët talibanë kanë njoftuar të premten se se forcat talibane anë pozicionuar në aeroportin e Kabulit dhe janë gati të marrin kontrollin e plotë këtë fundjavë, sapo forcat amerikane të largohen.
“Sapo amerikanët të largohen, ata thjesht duhet të na japin sinjalin dhe ne pastaj do të marrim përsipër kontrollin”, tha zyrtari.
Ndërkohë nga ana tjetër zëdhënësi i Pentagonit, John Kirby tha se talibanët nuk kanë nën kontroll ndonjë zonë ushtarake të aeroportit.
Më herët gjatë ditës, zëdhënësi i Pentagonit John Kirby tha se operacioni për lirimin e njerëzve nga Afganistani përmes aeroportit të Kabulit ishte ende një “kërcënim i prekshëm dhe i besueshëm” i Shtetit Islamik. Më shumë se 180 njerëz u vranë në sulmin terrorist para dy ditësh, përfshirë 13 ushtarë amerikanë.
Zëdhënësja e Shtëpisë së Bardhë Jen Psaki tha se një sulm tjetër ishte “i mundshëm”, duke cituar ekspertë të sigurisë. Transporti ajror i njerëzve që kërkojnë të largohen nga Afganistani vazhdon përmes aeroportit të Kabulit, vetëm disa ditë para afatit të 31 gushtit që trupat amerikane të largohen nga vendi pas 20 vitesh luftë.
Disa mijëra njerëz ende po largohen nga aeroporti, duke shpresuar të hipin në një aeroplan, sipas gjeneralit Hank Taylor, i cili ka siguruar se operacionet e evakuimit do të kryhen “deri në minutën e fundit”. Transporti gjigant ajror raportohet se deri më tani ka lejuar më shumë se 100,000 të huaj dhe afganë të largohen nga Afganistani.
