Policia e Fierit ka arrestuar 5 persona, për vepra të ndryshme penale. Specialistët e Seksionit për Hetimin e Narkotikëve në DVP Fier arrestuan në flagrancë 18-vjeçarin Aristir Mine, banues në Gjokalli, Fier, pasi gjatë kontrollit të banesës, iu gjet dhe sekuestrua një sasi me lëndë narkotike cannabis sativa, e ndarë në doza gati për shitje.
Ndërkohë, specialistët për Hetimin e Krimeve në Komisariatin e Policisë Lushnjë arrestuan në flagrancë shtetasin Kujtim Mema, 62 vjeç, banues në fshatin Golem, pasi duke djegur barëra në tokën e tij, si pasojë flakët e zjarrit kanë dalë jashtë kontrollit duke rrezikuar tokat e tjera përreth.
Po ashtu pas hekurave përfundoi edhe shtetasi Eduart Çaushaj, pasi ishte shpallur sepse akuzohet se në 21 gusht, në lagjen “Kastriot” Fier, ka vjedhur biçikletën e shtetasit me inicialet P. R., e cila u gjet në banesën e 34-vjeçarit dhe u sekuestrua në cilësinë e provës materiale.
