Merkato e verës në futbollin shqiptar po shkon drejt fundit, por Partizani mbetet ende me shpresën për të kryer disa përforcime. Trajneri Ilir Daja e ka bërë vetë të ditur se çfarë pret nga merkatoja, ku kërkesat kryesore mbeten në mesfushë dhe në sulm. Rrjedha e fundit e ngjarjeve në kampin e kuq, ka nxjerrë në pah mangësitë që skuadra ka në fazën sulmuese.
U bë kohë që Partizani nuk e ka një qendërsulmues të mirëfilltë në ekip ose siç thuhet ndryshe “pyka”. Në disa sesione lëvizjesh futbollistësh, Partizani ka kryer afrime për majën e sulmit, por të gjithë të ardhurit në 4 sezonet e fundit kanë dalë skarco.
Edhe për momentin, trajneri Ilir Daja nuk e ka nën urdhrat e tij një “pykë” të mirëfilltë, por është sajuar me përshtatje futbollistësh.
Më i fundit që po e kryen misionin e qendërsulmuesit të improvizuar është Stenio Zhunior, i cili në përgjithësi e ka treguar veten, sidomos në turin e parë të Konferencë Ligës, ku shënoi 4 gola në dy sfida ndaj moldavëve të Sfintulit.
Dëmtimi i fundit i brazilianit e ka nxjerrë zbuluar Partizanin në fazën sulmuese, pasi trajneri Daja e ka në organikë një zëvendësues me potencial. Zhunior ka pësuar një dëmtim gjatë fazës përgatitore që ekipi po kryen në Ohër dhe për këtë shkak 30- vjeçari nuk është aktivizuar në dy miqësoret e fundit ndaj Egnatias dhe Pogradecit.
Zhunior e ka lënë grumbullimin e skuadrës në Ohër dhe prej ditësh ndodhet në Tiranë, ku po kryen ekzaminime dhe fazë riaftësuese.
Gjasat janë që trajneri Daja të mos e ketë në dispozicion edhe për këtë javë brazilianin në stërvitje. Nëse nuk ka një përmirësim të shpejtë, i bie që braziliani do ta presë në kryeqytet ekipin, kur të kthehet nga faza në Ohër. Për momentin maja e sulmit të Partizanit mbetet në dorë të dy adoleshentëve, 18-vjeçarit Klevis Dragaj që shënoi ndaj Egantias, si dhe 19-vjeçarit Franc Marinaj.
Me “brumin” që ka trajneri Daja ka nisur edhe eksperiment pa Zhuniorin dhe duke e marrë të mirëqenë rastin më të keq se nuk do të gjejë “pykë” tjetër. Braziliani Lukas Kardozo duket si një “fshirëse xhamash makine” në sulm, duke u aktivizuar ku ka nevojë ekipi. Kardozo, jo vetëm tani, por edhe në të shkuarën është provuar si qendërsulmues, por nuk ka rezultuar efektiv si “pykë”.
Partizani ka vite që luan me “nëntësh fals” dhe nëse në javën e mbetur të merkatos drejtuesit nuk gjejnë personin e duhur, i bie që tradita të vijojë. Mario Gjata, sulmuesi i Apolonisë, është një nga emrat e lakuar dhe lakmuar, por transferimi i tij është stërzgjatur aq shumë, sa shpresat po shuhen.
/Panoramasport
