Kastrioti është zhvendosur në Fushë-Krujë, aty ku ka nisur fazën përgatitore e cila do të zgjasë afro dy javë. Gjatë këtyre ditëve lëvizjet kanë qenë të pakta, ndërsa pritet që të konfirmohen edhe dy afrimet e reja, Bekim Dida dhe Endri Reçi.
Të dy lojtarët janë stërvitur prej ditësh me krutanët, ndërsa firma dhe prezantimi i tyre ende nuk është bërë. Sakaq, gjatë qëndrimit në Fushë-Krujë, skuadra pritet të zhvillojë disa teste miqësore, duke filluar që nga kjo e mërkurë.
AKORDI – Pak ditë më parë, krutanët po negocionin me lojtarin kroat Damir Grëgiç, ndërsa nga burime të besueshme në klub bëjnë me dije se shtatlarti ka rënë dakord parimisht me Kastriotin dhe gjatë këtyre ditëve pritet që të mbërrijë në Krujë për t’iu bashkuar skuadrës.
Ky është një afrim “big” për krutanët, pasi mbrojtësi 29-vjeçar, 193 cm, është një lojtar me një “CV” mjaft të pasur, pasi ka luajtur me shumë skuadra në ligat elitare, duke filluar që me Inter Zapresic Kroaci, në ligë e parë dhe Superligë, me Aluminij dhe Rudarin në Superligën sllovene. Në Indi me Pune City, si edhe në Austri. Grëgiç pritet që të mbërrijë në Shqipëri gjatë kësaj jave.
Ndizet drita jeshile për nigerianin Henri Okebugu, i cili pati mbetur në Nigeri për shkak dokumentacioni. Nga sa mësohet, nigeriani do të udhëtojë drejt Shqipërisë këtë fundjavë, duke bërë në këtë mënyrë që krutanët të jenë të kompletuar në prag të sezonit të ri. /Panoramasport
