Një i ri, banues në Tiranë, i cili akuzohet se ka dhunuar dhjetëra vajza, raportohet se është lënë i lirë nga autoritetet pavarësisht denoncimeve.
Fillimisht, ishte një vajzë, e cila denoncoi në portalin “JOQ Albania” se ishte dhunuar në mes të kryeqytetit nga një i ri, teksa kthehej nga puna në mbrëmje. Ajo publikoi pamje nga lëndimet e marra dhe pamje të autorit, të marra nga një kamera sigurie në rrugën ku ndodhi ngjarja. Vajza ka bërë dhe kallëzim në polici për ngjarjen.
“Në orën 00:27, 19.08.2021, më ka goditur një djalë në qendër tek “Mon Chéri”. Djali me ka goditur aq fort (sipas doktorit, me doreze) sa më duhet të qepja buzën dhe brenda dhe jashtë. Nuk e pashë djalin kur po vinte, sepse isha në cel dhe me ka goditur e ka ikur direkt. As nuk foli, as nuk bëri reagim tjetër përveç grushtit. E theksoj që nuk kam probleme me njeri, sa kisha mbaruar punën dhe po shkoja në shtëpi. Më kanë thënë që ky rast është përsëritur dhe herë tjetër, por vetëm me goca”, shprehet ajo.
https://www.youtube.com/watch?v=Iy1I0IdpkdE&t=10s
Pas publikimit të rastit, portali në fjalë raportoi se shumë vajza shkruan në redaksinë e “JOQ” duke identifikuar dhunuesin. Sipas “JOQ”, pas publikimit të rastit të parë, janë shumë vajza që kanë denoncuar se janë dhunuar nga ky person.
Por, duket se pavarësisht denoncimeve, autoritetet nuk kanë vepruar për të ndëshkuar autorin.
Portali ka publikuar edhe pamje të personit në fjalë dhe raporton se është një i ri rreth të 30-ave i cili banon në zonën e “Myslym Shyrit” dhe quhet Denis.
