Nga Boldnews.al
Shkolla qenka dëshirë. Në do shkon, në do jo. Një herë u tha se shkollat do të happen më datë 13 shtator, por më pas qeveria u pendua, e ndryshoi datën. Por sot, në një dalje të ministres nëpërmjet Fejsbuksit, ministrja e Arsimit Evis Kushi lajmëroi se hapja e shkollave nga klasa e parë në gjimnaz, do të shtyhej për në 27 shtator.
“Duke vlerësuar dhe shqyrtuar me kujdes shqetësimet dhe sugjerimet e ardhura nga mësuesit dhe prindërit, vendosëm të zgjasim periudhën e mësimit plotësues deri në nisjen e vitit të ri shkollor, jo më 13 shtator, por më 27 shtator 2021. Gjatë periudhës së mësimit plotësues, që nis që më 1 shtator, nxënësit nuk janë të detyruar të shkojnë çdo ditë në shkollë, ndërsa mësuesit dhe të gjitha stafet shkollore do të jenë aty me kohë të plotë për të ofruar krahas mësimit plotësues, edhe veprimtari të ndryshme sportive, artistike dhe kulturore”-tha ministrja, ndërsa lexonte këtë qëndrim në një monitor që i shpaqej para fytyrës.
Por më interesante është një frazë e këtij qëndrimi zyrtar. “Gjatë periudhës së mësimit plotësues, që nis që më 1 shtator, nxënësit nuk janë të detyruar të shkojnë çdo ditë në shkollë”. Pra sipas ministres është fakultative, nëse duan le të shkojnë, nëse jo të qëndrojnë në shtëpi. Arsimi parauniversitar nuk është me “dëshirë”, por i detryruar. Qeveria ka për detyrë të krijojë kushtet e nevojshme për çdo nxënës për tu shkolluar. Por pikërisht problemet nëpër shkolla që shumë janë pa kushtet e duhura po e bëjnë qeverinë edhe më të papërgjeshme, duke shtyrë herë pas here nisjen e procesit mësimor.
Ky është një shqetësim masiv i mijëra prindërve që duhet t’i dërgonin fëmijët në shkolla, por çelësat e “dyrve të dijes” duket se kanë rënë në duart e të paditurve, dhe akoma më rëndë abuzuesve. Shtyrja e hapjes së shkollave lidhet me dy fakte të rënda. Së pari është investuar shumë pak në rikonstruksionin apo ndërtimin e shkollave të reja, duke bërë që abientet të mos përballojnë fluksin e nxënësve, për më shumë që duhet të ndiqen edhe rregullat antikovid. Në shumë godina që duhet të presin nxënësit mungon edhe uji i pijshëm apo sistemi i ngrohjes.
Miliona euro u derdhën në prag të fushatës elektorale dhe tashmë arka e shtetit është boshatisur nga duart e lyer me yndyrën e pushtetit. Për shkollat ka mbetur fare pak dhe po shtyhet në kohë hapja e tyre. Një tjetër problem është edhe përhapja e shpejtë e covidit gjatë javëve të fundit. Ndonëse në “faqet propagandistike” flitet për mbi 1.7 milionë vaksina të kryera në popullsi, sërish numri i infektimeve mbetet mjaft i lartë. Kjo ka vënë në dyshim serioz cilësinë e vaksinave që në prodhim dhe më pas kushtet e ruajtjes së tyre, duke humbur efektivitetin.
Si “zgjidhje” për qeverinë mbetet shtyrja e afatit të hapjes së shkollave, por nuk është çudi që të kalohet në “planin B”, ose “çmenduria B”, që lidhet me mësimin online. Kjo metodë rezultoi thuajse dështim i plotë në vitin e kaluar. Në shumë zona të vendit mungon linja e internetit dhe nxënësit e kishin të pamundur që të përfshiheshin në mësimin online. Të gjithë këto probleme nga kush do të zgjidhen? Sigurisht nga ministrja Kushi duket fort e vështirë.
