Partia Demokratike ka sulmuar Ramën në vizitën e tij në Fushë -Krujë ku shpërndau dëmshpërblimet për zonat e përmbytura.
Zëdhënësja e Partisë Demokratike, Ina Zhupa e ka komentuar vizitën e kryeministrit duke e komentuar si elektorale pasi sipas saj Rama kujtohet tani për banorët dhe fatkeqësitë kur po afrojnë dhe zgjedhjet.
“Në kulmin e fatkeqësisë, Rama i braktisi banorët. Tani që po vijnë zgjedhjet, bën sikur po i dhimbsen”, tha Zhupa.
Me këto fjalë e ka komentuar Ina Zhupa,
“Ata dhe çdo qytetar i vendit e mban mend mirë se kur u rrethuan nga uji e balta, Edi Rama mori rrugët e botës për pushime luksi. Pikërisht, ditën kur qindra familje u përmbytën në Fushë-Krujë, Edi Rama shkoi në New York për ekspozitë pikture”, tha Zhupa nga selia blu.
“Sërish, ai nuk ka dhe nuk mban asnjë përgjegjësi, por fajin e kanë qytetarët, fajin e ka natyra, fajin e kanë kanalet që janë bllokuar. Ka 4 vjet që hedh para për luks, për zyra, për palma, për makina, për ekspozita pikture, për të parë NBA, për fundjavë me Gjushin, për shëtitje nëpër stadiumet e botës, para që po të shkonin për investime në bujqësi, në kanale kulluese e vaditëse nuk do kishte këto dëme me shiun e parë që bie. Këto para do të ishin të mjaftueshme për t’i dëmshpërblyer në kohë familjet e përmbytura e për tu ardhur në ndihmë fermerëve”, vijoi ajo.
“Këto janë përpjekje të dëshpëruara. Qytetarët nuk e besojnë më Edi Ramën. Sepse nuk mund të besohet dikush që të kthen kurrizin në ditën më të vështirë, dhe kthehet kur afrojnë zgjedhjet”, përfundoi Zhupa.
