Banorët e Sinecit kanë hequr dorë nga proceset gjyqësore kundër ndërtimit të ujësjellësit në zonë të mbrojtur.
Ambientalisti Sazan Guri ishte me ta pranë IKMT-së nga ku u shpreh se banorët kërkojnë që ky institucion të japë vendim për projektin, pasi është i vetmi që ende nuk është shprehur.
“Së pari banorët kanë hequr dorë nga procesi gjyqësor për faktin se 5 institucione shtetërore janë shprehur në favor të banorëve. Ky është institucioni i fundit që do shprehet, nëse IKMT-ja vepron kundër atëherë banorëve i lind e drejta për grevë urie, proces gjyqësor deri në Hagë”, tha Guri.
Banorët kërkojnë ndërprerjen e punimeve, dhe rehabilitimin e zonës nga disa ndërhyrjet që janë bërë.
“Ndërprerja e punimeve në zonën e mbrojtur si dhe të rehabilitojnë zonën atje ku e kanë dëmtuar dhe ta kthejnë në gjendjen e mëparshme, të mbjellin përsëri bimësinë siç ishte”, thotë banori.
“Kërkojmë që këta të bëjnë drejtësi”, thotë një tjetër.
Disa ditë më parë ndërtimi i ri i ujësjellësit solli edhe përplasje të qytetarëve të Sinecit me ata të zonave të tjera që e mbështesin këtë projekt.
