Afganët po largohen nga vendi i tyre nga frika e hakmarrjes së talebanëve që kanë marrë nën kontroll të gjithë territorin e Afganistanit.
Ndërsa siç është konfirmuar sot edhe nga kryeministri, Edi Rama një pjesë e tyre do të sillet me ndihmën e SHBA-së në Shqipëri. Lidhur me lajmin reagon edhe Komuniteti Myliman i Shqipërisë dhe u bën thirrje shqiptarëve të tregohen bujarë dhe t’i mirëpresin mërgimtarët, të cilët ikin nga përndjekja e regjimit të ri.
Reagimi i KMSH
Me emrin e Zotit, Mëshiruesit Mëshirëbërësit!
Të dashur qytetarë, myslimanët anë e kënd botës, këto ditë, janë në muajin e parë të vitit të ri hixhri.
Viti i ri në fenë islame është përkujtimi i emigrimit të Profetit Muhamed (a.s.) dhe myslimanëve nga Meka për në Medinë, si shkak i persekutimit dhe përndjekjes.
Motra dhe vëllezër, ditët e fundit u njohëm me lajmin se vendi ynë, Shqipëria, do të strehojë qindra mërgimtarë nga Afganistani, të cilët ikin nga përndjekja e regjimit të ri që po vjen në vendin e tyre.
Si besimtarë dhe si shqiptarë ne na takon t’i mirëpresim dhe të tregohemi bujarë me ta.
Mysafiri është amanet i Zotit për mikpritësin.
Institucionet e vendit dhe aleatët e vendit tonë kanë marrë të gjitha masat e duhura që kjo situatë të menaxhohet më së miri.
Komuniteti Mysliman i Shqipërisë është i gatshtshëm të japë ndihmesën e tij, në qoftë se nevojitet, për këtë rast.
Gjithashtu, ne i bëjmë thirrje besimtarëve të tregohen bujarë, të paqtë dhe mikpritës me mërgimtarët për hir të Allahut.
I lutemi Zotit të gjithësisë që konfliktet dhe luftërat të marrin fund në çdo vend të botës!
