Ylli argjentinas Lionel Messi tashmë është lojtar i PSG, por klubi i Barcelonës i ka borxh sulmuesit argjentinas, 52 milionë euro. E gjithë shuma janë detyrime të prapambetura që klubi duhet ti jepte lojtarit si pagë gjatë muajve të pandemisë.
Katalonja Sport shkruan se ish -presidenti i Barcelonës, Josep Maria Bartomeu, ra dakord me lojtarët e ekipit të parë për të “ngrirë” pagesën në momentin kur kampionati u ndal për shkak të pandemisë koronavirus, dhe shton më tej se humbja e këtyre parave nuk ka të bëjë me bonusin e besnikërisë, siç u spekulua më parë.
Gjithashtu thuhet se Barcelona planifikon të paguajë këtë borxh midis pjesës tjetër të vitit 2021 dhe gjatë vitit 2022, dhe kushtet e pagesës aktualisht janë duke u negociuar nga Messi dhe avokatët e klubit.
Messi mbërriti në akademinë e të rinjve të Barcelonës në vitin 2000 nga Newell’s Old Boys, dhe e ka kaluar të gjithë karrierën e tij profesionale në fanellën e katalanasve.
Ai shënoi 672 gola dhe dha 305 asiste për Barçën në 778 paraqitje, dhe që nga 1 korriku i këtij viti “Pleshti” ishte lojtar i lirë dhe pasi klubi nuk arriti t’i rinovojë kontratën për shkak të problemeve financiare, ai vendosi të vazhdojë karrierën e tij tek PSG.
Me fanellën e Barcelonës, Messi fitoi 34 trofe, më të rëndësishmit prej të cilëve janë dhjetë tituj të kampionatit spanjoll dhe katër Liga të Kampionëve. Gjithashtu ai është fitues i 6 “Topave të Artë”.
