Një tjetër rast trafikimi lëndësh narkotike është goditur ditën e sotme nga Policia e Shkodrës. Gjatë një kontrolli në një automjet me targa italiane në Pikën Kufitare Muriqan, janë gjetur 14.5 kg lëndë narkotike e dyshuar cannabis sattiva.
Policia vuti në pranga një shtetas italian, Lorenzo Pratti, 24 vjeç, i cili kishte ardhur në vendin tonë të furnizohej me drogë, por mesa duket ka ngritur dyshime tek Policia dhe pas kontrollit ka dalë zbuluar.
I riu kishte fshehur 54 pakot me kanabis në pjesë të ndryshme të makinës, pas sediljeve, tek pjesa e rrotave, në motor, etj.
Pas sekuestrimit të lëndës narkotike, Specialistët e Seksionit për Hetimin e Narkotikëve në Drejtorinë Vendore të Policisë Shkodër, në bashkëpunim me shërbimet e Policisë Kufitare, arrestuan në flagrancë shtetasin Lorenzo Pratti, 24 vjeç, banues në Itali.
“Më datë 26.12.2016 në Pikën Kufitare në Muriqan, gjatë kontrollit të ushtruar në vijën e dytë në mjetit tip “Audi” me targa DE 090 AT, me drejtues dhe pronar shtetasin e arrestuar, Shërbimet e Policisë kanë dyshuar se në brendësi të mjetit mund të kishte lëndë narkotike.
Menjëhere Shërbimet e Policisë kanë ushtruar kontroll të imtësishëm të automjetit ku u gjetën: 54 pako me peshë 14.5 kg lëndë narkotike e dyshuar e llojit cannabis-sattiva, e cila u sekuestrua në cilësinë e provës materiale”, thuhet në njoftimin e Policisë.
Materialet proceduriale iu referuan Prokurorisë së Krimeve të Rënda Tiranë për veprime të mëtejshme për veprën penale “Trafikimi i narkotikëve”.
