Ish-kryeministri i Kosovës Ramush Haradinaj, përmes një interviste të dhënë në RTK mbrëmjen e sotme i është rikthyer debatit me kryeministrin Edi Rama dhe liderët evropianë në Berlin rreth dy vite më parë.
Ishte kryeministri Rama, ai i cili riktheu në vemendjen e opinionit publik debatin në Berlin, ku tha se Haradinaj iu drejtua me fjalët “s’më han luli për ju”, Merkelit dhe Macron-it të cilët po negocionin për heqjen e taksës ndaj Serbisë me qëllim liberalizimin e vizave për Kosovën.
Në intervistën e dhënë mbrëmjen e sotme Haradinaj deklaron se në Berlin pati një bisedë të pakëndshme me Edi Ramën dhe jo me liderët evropianë, duke nënkuptuar se togëfjalëshi “s’më han luli për ty”, i ishte thënë kryeministrit shqiptar. Të njëjtën gjë e konfirmoi dje dhe ish-ministri i Drejtësisë së Kosovës Selim Selimi, i cili ka qenë prezent në takim asokohe.
“Zhgënjimi i kryeministrit Rama dhe ato që thotë sot janë të pabazuara, në atë kohë ai ka qenë i rreshtuar gabim, për ndarjen e Kosovës që ishte rrezik për Ballkanin që do të na dërgonte në luftëra të reja. Unë s’ja kam treguar arat amerikanëve as gjermanëve, por jam detyruar të ruaj arat nga vëllau im, Edi Rama,”- ka thënë Haradinaj në intervistë. Haradinaj konfirmoi se ka pasur bisedë me fjalor të ashpër me Ramën, ashtu siç bëri me dije kreu i ekzekutivit të Shqipërisë para një dite.
