Fatmir Pjetri, Arbër Çekaj dhe Lulzim Çepele u shprehën sot se nuk e kanë bërë bashkë planin e arratisjes nga burgu “313”.
Iniciativën e arratisjes nga ky institucion e ka marrë përsipër Fatmir Pjetri, i cili ka thënë se nuk ka komunikuar me asnjë nga dy të burgosurit e tjerë.
Arbër Çekaj tha se e ka ndjekur instiktivisht nga pas Pjetrin dhe kur është kthjelluar është ndalur, ndërsa ka mohuar që të ketë goditur ndonjë gardian burgu.
“Nuk kam goditur asnjë polic. I ndikuar nga gjendja psikologjike për shkak të burgosjes së babait, kam ndjekur në mënyrë instiktive Fatmir Pjetrin kur e kam parë duke u larguar. Nuk ka qenë meritë e policisë ndalimi im, por kur jam kthjelluar se kjo nuk është zgjidhje, kam ndaluar.
Unë nuk jam kriminel dhe respektoj ligjet e shtetit, në të kundërt tani do të ishte larguar në Dubai apo ndonjë shtet tjetër. Në qoftë se do isha kriminel, do ishte duke pirë kafe në Kosta Rika.
Ka segmente të caktuara të shtetit që po punojnë kundër familjes Çekaj. Unë jam thjesht viktimë”, tha Çekaj.
Gjithashtu Lulzim Çepele e ka mohuar të ketë lidhje me tentativën e arratisjes. Ai është shprehur se damarët e dorës i ka dëmtuar rreth orës 14.00 të pasdites ndërsa dy të tjerët tentuan të arratiseshin rreth orës 15.00.
“Kam qenë në kushte të vështira psikologjike për arsye familjare,” ka thënë ai duke shtuar se përpara ca kohësh i kanë vrarë edhe nipin.
