Nga BoldNews.al
Me një njoftim të thatë dhe të beftë, me vetëm 40 fjalë, Bashkia e Durrësit do t’i “falë” koncesionarit të plehrave në Sharrë, Tiranë, plot 3 milionë euro. Kryetarja e pa zgjedhur e Bashkisë së Durrësit, Ermonela Sako, ka firmosur procedurën e majme dhe e ka publikuar në Agjencinë e Prokurimit Publik.
Por, nuk është tender! Është vetëm një njoftim për të dhënë këtë shumë. BoldNews.al ka hulumtuar procedurën e shpallur, ku rezulton se bëhet fjalë për negocim. Megjithëse nuk ka emër kompanie që do të negociohet, plehrat e Durrësit do të transferohen në Tiranë, pas “bekimit” nga qeveria, e cila vetëm disa ditë më parë nxori një VKM për mnështetje financiare për Bashkinë e Durrësit për depozitimin e mbetjeve.
Situata alarmante e plehrave në Durrës tashmë e ka një “fitues”; koncesionari i mbetjeve në Sharrë! Të gjithë të tjerët, taksapaguesit, Bashkia e Durrësit apo Qeveria (jo firmëtarët), janë humbës. Loja e pistë me mbetjet “detyroi” fillimisht Këshillin e Ministrave dhe më pas Bashkinë e Durrësit të merrte një vendim për transferimin e tyre drejt kryeqytetit, pikërisht në landfillin e Sharrës, i dhënë me koncesion. Taksa prej 28 eurosh/ton do të aplikohet edhe për mbetjet e Durrësit.
BoldNews.al ka ndjekur në vijimësi problematikën e plehrave në Durrës dhe Kavajë, ndërsa pas kësaj situate fshihej pikërisht koncesionari. Dhe, disa ditë pas VKM-së së famshme për mbështetje, vjen edhe procedura e parë. Më sipër, si faksimile, në botuam njoftimin e Bashkisë së Durrësit. Është vetëm ai njoftim i thatë, pa asnjë dokument shoqërues në APP ku Bashkia e Durrësit po shpenzon plot 3 milionë euro për depozitimim e mbetjeve.
“Objekti i procedurës së prokurimit: Depozitimi i mbetjeve urbane Bashkia Durrës. Autoriteti kontraktor: Bashkia Durrës. Fondi 287,216,000.00 lekë. Data e publikimit: 09-08-2021. Viti 2021. Gusht. Kodi CPV: 98341130-5 – Shërbime pastrimi. Tipi i procedurës: Me negocim, pa njoftim” është publikimi i Bashkisë. Pa asnjë dokument shoqërues se ku do të shkojnë këto 3 milionë eurot.
Apo si do të negociohet. Asnjë, vetëm që këto para’ do të përdoren për depozitim. Po pastrimi dhe transportimi deri në Tiranë, sa kushtojnë? Apo janë të ardhura të tjera. Natyrisht, situata alarmante në Durrës dontë një zgjidhje. Por, tashmë po bëhen alarmante shifrat e shpenzuara. Fillimisht kontrata për pastrim. Më pas për transport. Dhe tani për depozitim, pa harruar dhjetëra milionë euro për rehabilitimin e landfillit egzistues. Të gjitha këto, në kurriz të taksapaguesve nga e gjithë Shqipëria.
Disa ditë më parë, kryeministri Edi Rama, i dha porosi zv.kryeministrit që të firmoste VKM-në për mbështetje financiare të Bashkisë së Durrësit për depozitimin e plehrave. Duke u fshehur pas Braçes së vogël në shtat, por të madh në firmë, qeveria, me këtë VKM, nuk po ndihmonte Durrësin, por koncesionarin. Në këtë vendim thuhet se qeveria ka vendosur të miratojë kërkesën e bërë nga Bashkia e Durrësit për mbështetje financiare për menaxhimin e mbetjeve të paraqitura mbi bazën e studimit të tregut dhe gjetjes së zgjidhjes më të mirë financiare.
Sipas VKM-së, duke filluar nga viti 2022 dhe në vazhdim, pjesa e financimit për menaxhimin e mbetjeve nga buxheti i shtetit do të jetë pjesë e dokumentit të programit buxhetor afatmesëm dhe ligjit vjetor të buxhetit. “Mbështetja financiare e qeverisjes qendrore për Bashkinë Durrës do të bëhet nëpërmjet transfertave specifike vjetore” thuhet në vendim.