Nga Boldnews.al
Zyra e PR (Public Relation) e Qeverisë është vënë në lëvizje këto orët e fundit, për të mbuluar dështimin spektakolar me menaxhimin e zjarreve në Shqipëri.
Pasi nuk u tha asnjë fjalë për “shëtitjet” e Ramës me helikopterin e vetëm në gjendje pune në Shqipëri, i cili mund të përdorej për shuarjen e flakëve që në krye të herës dhe për pushimet e pandërprera të Shefit të Emergjencave Civile, Haki Çako, i cili deklaroi se “merr leje vetëm para Zotit”, tashmë propaganda e kryeministrit ka kaluar në ofensivë.
Me një “regji qendrore”, zyrtarët e lartë qeveritarë janë paraqitur publikisht këtë të Martë, duke folur për zjarrvënës “terroristë”, të nxitur nga politika apo të paguar nga qarqe të caktuara.
Zëvendëskryeministri Erion Braçe, Ministria e Mbrojtjes nën drejtimin e Niko Peleshit dhe kreu i Emergjencave Civile kanë folur me të njëjtën gjuhë, pavarësisht se gjendeshin në vende të ndryshme.
Zëvendësi i Ramës, në një postim në “Facebook”, shkruan: “…Ti nuk je politikan që do destabilitetin edhe me zjarr e s’ta bën goja prej ditësh një thirrje: mos ndiz zjarr! Ti je ai që paguan në fund, këta jo!! Vilat në Lalëz i kanë në rregull me fikëse zjarri!”, shkruan Braçe, duke iu referuar qartësisht drejtuesve kryesorë të opozitës.
Ministria e Mbrojtjes flet për zjarrvënës të qëllimshëm, të cilët “po luajnë” me nervat e autoriteteve.
“Në Llogara jemi duke e ndjekur prej ditësh situatën dhe vetëm dje kemi pasur 250 trupa në terren. Në të gdhirë dhe kur ishim gati të shpallnin triumfin ne Llogara pas gjysmë ore u panë dy persona me elektrik dore dhe më pas u aktivizuan sërish dy vatra të reja”, tha Ministria e Mbrojtjes.
Ndërsa kreu i Emergjencave Civile, Haki Çako, ishte më poetik në fjalët e tij të thëna para medias pranë tunelit të Kalimashit, në Kukës.
“Në fakt, duket sikur përsëritet historia e Rozafës, sapo fikim një vatër, ndodh aktivizimi i një zjarri tjetër që të lë të kuptosh se këto janë të qëllimshme. Është një terren aq i madh sa është e vështirtë të mbikëqyrësh të gjithë pyjet dhe hapësirën. Terreni njhet më mirë nga banorët dhe ata që kanë qëllime kriminale për t’i vënë zjarrin, të cilët paguhen nga qarqe të caktuara” tha Çako.
Duke iu referuar “praktikave” të mëparshme, kjo fryma e kërkimit të terroristëve dhe grupeve armiqësore, të paguara nga kushedi se kush, të cilët gjenden pas zjarrvënieve, do të vijojë me personazhe tipike për këto strategji, si Elisa Spiropali dhe “Elisa” e “Elisë” të tjerë të Rilindjes.
Dhe, në fund, siç ka ndodhur përherë, do të shfaqet vetë Edi Rama, duke shpallur luftën me grupet terroriste dhe “të paguarit” për zjarrëvënie, të cilët kanë qëllim prishjen e imazhit qeveritar.
