Safet Gjici, kryebashkiaku i emëruar i Kukësit, u shpreh sot në një intervistë për Faxnews se zjarri në zonën pranë tunelit të Kalimashit është vënë nën kontroll një orë pas mesnate.
Gjici tha se zjarri u shua pa ardhur ende forcat nga Kosova, të cilët kanë dalë mëngjesin e sotëm në terren, ku më kritike mbetet situata në majën e Rrunës.
“Që nga ora 4 e pasdites së djeshme, dhe deri në orën 01:00 kemi arritur që të evitojmë rrezikun mbi tunelin e Kalimashit, vatra që është shumë e vështirë është ajo e Malit të Rrunës, ka ndërhyrje nga ajri dhe nga toka, për të izoluar tërësisht vijën e zjarrit në majën e Rrunës, e cila është rreth 5 km.
Gjici tha se për shkak të terrenit shumë të vështirë, dhe vijës së gjatë të zjarrit prej 5 km, e bëjnë të domosdoshme ndërhyrjen nga ajri për neutralizimin e flakëve. Kryebashkiaku pranoi se duhen mjete të reja për përballimin e këtyre situatave, pasi sipas tij Kukësi ka në dispozicion vetëm dy zjarrfikëse, ndërsa terreni është shumë i madh dhe i thyer.
Nuk dihet nëse kryebashkiaku i Kukësit po tregohet mosmirënjohës apo po zbaton një urdhër për të sfumuar rolin e trupave që erdhën nga Kosova, por nga pamjet që emetoheshin pas mesnatës së djeshme, madje edhe nga mediat ndërkombëtare, përfshirë edhe Zërin e Amerikës, situata në Kalimash ishte apokaliptike, me zjarre që kishin përfshirë sipërfaqe të tëra dhe që përhapeshin me shpejtësi.
Dhe në operacionin për shuarjen e zjarreve në Kalimash u angazhuan edhe trupat nga Kosova, që u falenderuan publikisht nga Presidenti Ilir Meta, por edhe kreu i PD, Lulzim Basha.
