Komisioni i Mbrojtjes Civile, Prefektura Kukës ka bërë mëngjesin e sotëm të ditur situatën aktuale të zjarrit në Majën e Rrunës.
Bëhet e ditur se vatra në vendin e quajtur Laku i Thive është aktive.
Njoftohet gjithashtu se edhe sipër Tunelit të Kalimashit, me gjithë punën e bërë, nuk është bërë i mundur izolimi dhe futja nën kontroll e flakëve, ndërsa raportohet se zjarri në Qafën e Kumbullës po shkon në drejtim të fshatit Trull, në Surroj ndërsa zjarri i Majës së Rrunës, po shkon në drejtim të fshatit Shemri.
Për sot njoftohet se janë angazhuar 12 forca zjarrfikëse, 5 punonjës të pyjores dhe 20 forca nga komuniteti.
Po ashtu, të angazhuara janë 18 forca ushtarake të DMR-së Kukës dhe një mjet zjarrfikës si dhe forca të emergjencës civile të Bashkisë Kukës dhe Shërbimit Zjarrfikës të kësaj bashkie, gjithashtu pritet që helikopteri të shkojë në këtë zonë, për të bërë të mundur neutralizimin e flakëve.
