Kryeministri Edi Rama ka publikuar një foto të NASA-s lidhur me situatën e zjarreve në të gjithë Botën, e cila një ditë më parë qarkulloi në mediat ndërkombëtare.
Duket se Rama e ka përdorur këtë foto dhe informacionet nga NASA si një formë justifikimi lidhur me zjarret në Shqipëri. Në fakt Kryeministrit askush nuk i ka thënë se zjarre ka vetëm në Shqipëri, por kritikat i janë drejtuar për mënyrën se si strukturat qeveritare menaxhojnë situatën, reagimi i tyre i vonuar, mungesa e pajisjeve, si dhe mungesa e transparencës.
Pra Ramës askush nuk i ka thënë se pyjet apo kullotat, male apo banesa qytetarësh, rrezikohen vetëm në Shqipëri, pasi situata është më katastrofike në Greqi apo Turqi, por problemi në Shqipëri është se Qeveria analizon nga rrjetet sociale, bën show dhe propagandë, ndërsa ekipet zjarrfikëse në terren nuk kanë as kambale që durojnë nxehtësinë, as veshjet e duhura, as pajisjet, madje edhe makinat e zjarrfikësve mund të mos kenë ujë, ndërsa Kryeministri shfaqet duke shëtitur me helikopter.
“Zjarret në pyje kanë shpërthyer në shumë kontinente nga Amerika në Europë dhe nga Afrika në Azi, me një numër në rritje zjarresh në shumë vende krahasuar me vitet e kaluara“, shkruan kreu i qeverisë në rrjetin social.
Reagimi i Ramës vjen në një kohë kur situata me zjarret në Jug të Shqipërisë paraqitet e vështirë, ku në Dukat po ndërhyhet me helikopter për të mbajtur në kontroll flakët.
POSTIMI I EDI RAMËS
MIRËMËNGJES
me këtë përmbledhje të NASA (Departamenti për studimin e zjarreve), mbi pasojat e zjarreve në Amerikë, Europë, Afrikë e Azi.
***Zjarret në pyje kanë shpërthyer në shumë kontinente nga Amerika në Europë dhe nga Afrika në Azi, me një numër në rritje zjarresh në shumë vende krahasuar me vitet e kaluara; Kanada, 4.891 zjarre në pyje të raportuara deri tani në 2021.
SHBA, mbi 1.8 milion akër (728 mijë hektarë) pyje janë djegur në 97 zjarre masive në shumë shtete.
Francë, një sipërfaqe prej 22.807 hektarësh është djegur deri tani në 2021.
Itali, të paktën 20.000 hektarë janë shkatërruar nga zjarret që kanë nisur më 24 korrik, ndërsa deri në 1.500 persona janë evakuar.
Rumani, kanë shpërthyer zjarre në pjesën jugore, përfshirë Bukureshtin dhe zonat pranë kufirit me Bullgarinë.
Rusi, mbi 1.3 milionë hektarë pyje janë djegur nga zjarret që nisën në korrik.
Amerika e Jugut, zjarret që nisën pranë autostradës në provincën Rio Negro, në veri të Patagonisë, në Argjentinë lëvizën më lart në veri dhe arritën deri në kryeqytetin Buenos Aires në bregun Atlantik. Portugali, zjarret shkatërruan mbi 2.000 hektarë pyje më 17 korrik. Greqi, zjarri që nisi në pyjet pranë Athinës më 27 korrik është përhapur deri në zonat e banuara.
Turqi, 174 zjarre shpërthyen në pyje në 38 nga 81 provincat e Turqisë, prej 28 korrikut deri më 4 gusht. Australi, zjarret në Neë South Ëales dëmtuan 5.5 milion hektarë tokë në 2020 dhe 31 milion hektarë tokë në 2021.
