Në një kohë kur pothuajse e gjithë Bota po përballet me variantin Delta të Covid-19, që sipas ekspertëve shëndetësorë ka një përhapje mjaft të shpejtë, epidemiologu Taulant Muka, shprehet se kushdo që e ka kaluar infeksionin nuk mund të quhet më i sëmurë sepse tashmë ka imunitet.
“E kam shumë të vështire të shpjegoj numrat në Shqipëri, sepse ne nuk kemi info si bëhen vaksinimet, si bëhen testet. Moshat e reja mund të dalin më shumë të infektuar nuk bën çdi sepse janë mosha më aktive. Duhet të vlerësojmë situatën epidemiologjike.
Kur personi e ka kaluar infeksionin, nuk mund të quhet një person i sëmurë pasi ai tashmë ka imunitet. Unë madje e quaj dozë të tretë për të rritur më tej imunitetin. Duhet të parandalojmë mbi të gjitha grupmoshat më të rrezikuara, prandaj shërben vaksina. Unë i ftoj ata që nuk janë vaksinuar që të vaksinohen”, deklaroi Muka për Faxnews.
Ai tha se doza e tretë e një vaksine Covid-19 është e nevojshme vetëm për ata që janë më shumë të rrezikuar.
“Duhet të kuptojmë që ka shumë artikulime publike se Delta është shumë më i tranmetueshëm dhe më i rrezikshëm. Faktikisht studimet e fundit nga Anglia nuk e vërtetojnë këtë gjë. Nga ana tjetër e ka ulur virulencën. Nëse shohim Britaninë, kishe një numër të madh të rasteve dhe vdekshmëria dhe shtrimi në spital është tepër i ulët krahasuar me valët e tjera.
Duhet të qetësojmë publikun, por të jemi të kujdesshëm. Doza e tretë mund të jetë e këshillueshme për ata që janë më të rrezikuar. Doza e trete duhet të mendohet vetëm për atë pjesë të popullatës që janë më shumë të rrezikuara dhe kur ka përhapje shumë të gjërë të infeksionit në popullatë. Pra aty ku mundësia për t’u infektuar është shumë e lartë”, përfundoi ai.
