Drejtori i Transportit Rrugor, Blendi Gonxhe, ka preferuar t´i quajë primitivë të gjithë ata që kanë kundërshtuar pjesëmarrjen e Goran Bregovic në koncertin e festës së birrës që do të organizohet në Korçë.
Prej disa ditësh emra të njohur nga fusha të ndryshme, në Shqipëri dhe Kosovë, kanë kundërshtuar pjesëmarrjen e Bregovic në këtë koncert, duke e lidhur këtë me faktin se ai ka qenë frymëzues i masakrave të serbëve, me këngët e tij.
Por, në një koment në gazetën Shqip, Gonxhe thekson se e mirëpret Bregoviçin siç ka bërë shefi i tij.
“Qëkur të jesh sllav është krim?! Po 1 milion turistët sllav përse po i mirëpresim? Po Hitlerin përse e dënojmë? A na lejohet kjo histeri dhe a duhet të heshtim? JO! Stuhia nacional-provinciale kundër Goran Bregoviç, selitur portaleve, nuk ka asnjë lidhje me artin e as me krenarinë, aq më pak me qytetërimin.
Me gjasë, mos vallë vjen prej pezmatimit “re-vv-olucionar” nga suksesi i nismës “Open Balkans”, makroprojekti politiko-ekonomik i mendjeve të hapura të Ballkanit?
Apo të jetë protagonizëm tifo-tallavesk veror? Në çdo rast, emancipimi, civilizimi, kultura e toleranca duhet të jenë zemra e shpirti ynë! Si shqiptarë, si njerëz, si ballkanas! Mirësevjen Goran!” shkruan Gonxhe.
Dhe pas këtij komenti të një prej drejtorëve dhe bashkëpunëtorëve të Edi Ramës, kuptohet se Gonxhe më shumë është i shqetësuar mbi reagimet plotësisht legjitime, qoftë në Kosovë edhe në Dhqipëri kundër pjesëmarrjes së Goran Bregovic në një koncert, se sa për atë se çfarë mund të ndjejnë të afërmit e atyre viktimave, që u masakruan nga çetnikët serbë.
